«موزاحيم» عربجه دير و «زحمته سالان» دئمکدير سؤزلوک آنلامي. سادجه قيزلارا سؤز آتانا دئييلمز. مثلن تصوور ائله کي، تانيماديغين کيمسه گئجه-يارايسي تئلئفونلا زنگ ائدير. آنجاق دانيشمير. و بو ايشي سورکلي ائديرسه، بو آدام «موزاحيم»دير (annoying). اگر قيزلار اوچون بو سؤزآتمالار سئويمسيز اولورسا، اونا دا «موزاهيم» دئنير. آما خوشلانسالار دئييلمز. ياديمدادير کي، من ده تزه جاوانليغيمدا قيزلارين آرخاسينا دوشرديک بعضن. آنجاق بو، اونلار اوچون اذييت ائديجي اؤزلليک داشيمازدي. بير تور تانيش اولماق اوچون بعضي سؤزلر دئيرديک. نزاکت ديشينا چيخمادان. بونا «موزاهيم» دئنمز. آنجاق قاباجا سؤزلره فيلان اوَت «موزاهيم» دئييلير.
«متلک» قيزلارا دئييلن سؤزلرين هاميسينا بير يئرده دئييلير. مثلن «قشنگ قيز»، «خانيم يئريشينيز گؤزلدير»، «به- به گؤزللييه باخ!» و بوتون خوش سؤزلر کي، او آندا بير اوغلان غئيري- شغوري اولاراق بير قيزا دئيير هاميسينا متلک دئييلير. متلک، سؤزجوکلرله ائروتيک کوچه ايليشکيسيدير بو کولتورده. آنجاق بو، سادجه ايرانا خاص دئييل، قربده ده وار. يني سؤزجوکلرله سوکاکدا ائروتيک ايلتيشيم. بو هاقدا فوروغ فرروخزادين گؤزل بير نئچه شعري وار. حتّی فوروغ بوندان چوخ خوشلانارميش. سادجه بونون سينيري بللي دئييل، بو سؤزجوکلرين. مثلن بير قيزين آرخاسينجا يورويوب اونون اوچون کوچوک بير شعري اونون دينليه جگي سسده اوخوماق دا متلکدير. بزن بو باسقيلار کي، ايراندا وار، هم قيزلاردا، هم ده اوغلانلاردا جينسل دليليک يارادير. ائروتيک سؤزلر سئکسوال سؤزجوکلره دؤنوشور. اوغلانلار چوخ تربييه سيز سؤزلر آغيزلارينا آليرلار. اگر کيمسه ائشيتمير، يالنيز او قيز ائشيديرسه. بزن ده جينسل ساپيقليغا دؤنوشور حتّی و بؤيوک سورونلار يارادير. بو متلکلرين مضمونو بير تورلو سوسيال پسيکولوگييانين بو قونوداکي دنکله مي و گؤسترگه سيدير. ايراندا شاهين زامانيندا چوخ يايقينلاشدي بو. چونکو شاه و اونون آتاسي قادينلارين باشيندان هيجابي آتدي. تاريخده ايلک دفعه قيزلارين گؤزلليکلري آچيقجا گؤروندو کوچه لرده. ميلت ده شاشقاينا دؤنوشدو. اصلینده ايسلام اينقيلابي دا بو شاشقينليغين محصولو ايدي.
بير لطيفه ده وار بو هاقدا: بير گون بير جاوان اوغلان گؤرور کي، حدديندن آرتيق گؤزل بير قيز گلير. هئي فيکيرلشير کي، بو قيزا نه دئسين؟ اويقون سؤز تاپا بيلمير و قيز دا گليب ياخينلاشيب کئچمک اوزره دير. قيزين اؤنونده ادبليجه اَييليب " خانيم هوزورلارينيزا متلک عرض ائتديم " دئيير.
منه گؤره بو متلکلرين مضمونو هر اؤلکهده قادين-کيشي ايليشکيلري نين تورلريندن و بو يولداکي سوجيال تجروبه لريندن آسيليدير. ياساق نه قدر چوخ اولوسا، معطلگين ده مضمونو اونا گؤره دييشير، آقرئسسيولشير و گؤرمه ميشليک دويقوسونون گؤستريجيسي اولور. ايستر-ايسته مز بو سؤزجوکلرله هم قيزلار، هم اوغلانلار بير تور روحي ذؤوق آليرلار سانکي. چونکو گونوموزده پسيخولوقلارين بئله بير تسبيتلري کي، اگر چاپقيينليق دويقوسو و بو دويقولاري ديله گتيرن سؤزجوکلر اولمازسا، بير گون ده بير ميليار اينسان اؤلور. اينسانلار دا تئز روحدان دوشر و قوجالار. چونکو بو سؤزجوکلر و بو ايليشکيلر آداملاردا حيات دويقولاريني اويادير، ياشام ائنئرژيسيني آرتيريرميش.
صنعت دئييلن اولقونون تمه لينده ده بؤيله گيزلين ائروتيزم دورماقدادير. يعني ائروتيزمي بير تورلو وارليغا ذؤوقلو و لذتلي دوکونوش اولاراق آلقيلارساق، صنعت بونو هر زامان دوشله ميشدير. مثلا بير اؤرنک سؤيلم. فوضولي نين بير شعري وار. دئيير کي، بو چايداکي سو ندن بئله تلسه-تلسه گئدير؟ سونرا دا اؤزو جاواب وئرير کي، بو سو داغلارين آرخاسيندا بير چيلپاق قيز وار. اونون بدنينه ساريليب ذؤوق آلماق اوچون قاچير! تصوور ائت کي، بير قيزين سودا چيممه سيني نئجه ساغليقلي و ذؤوقلو ائروتيزمله تصوير ائدير فوضولي:
«سو کي، سرگردان گزر، باشيندا واردير بير هوا
قاليبن بير گول اوزون سروي- خورامانين سئور»
بونو ايسترسن بير آز دا مودئرن شعرين «دوکونوش» فلسفه سي ايله آنلاتاليم: مودئرن شعر سؤزجوکلرله ايکي تور وارليغا دوکونوشون وار اولدوغونو دوشونر: «dans» و «disdans». نه دئمکدير بونلار؟
دانس، يعني آرالي و مسافه لي سئويشمه. ديسدانس ايسه، يني آراليقسيز و مسافسيز سئويشمه. مثلا بو آچيدان سئکسين صنعت ديلي ايله آنلاتيمي و ذؤوقون سؤزجوکلره داشينماسي شعرده «ديسدانس» و آراليقسيز سئويشمه نين تصويريدير. اصلینده قونو ايلک کز سئکولاريزمين رسسامليقدا اورتايا چيخماسي ايله مئيدانا گلدي. چونکو بو گون ايراندا «متلک» دئديگيميز ايليشکي تورو غربده ده وار ايدي و وار. قربده ديني دويقولاري، تابولاري و ياساقلاري اورتادان قالديرماغا قالخيشان صنعتلرين باشيندا رسسامليق گه لر. چونکو رسساملار اسرارنگيز چيلپاق قادين و اينسان رسميني چيزمه يه باشلاديلار. هز. مريه مي بئله چيلپاق رسم ائدن اولدو. رسم اثري دا دونموش بير خيال اولدوغو اوچون حرکتلي خياللار داها هوسله نيب و شعرده اؤزونو گؤسترمه يه باشلادي. مينيياتور صنعتينده کي بوتون ائروتيزم دويقولاري قادي نين اوزونه، بوينونا، باخيشينا، گئنل گؤرونوشونه اوداقلانميشدير. چونکو قاديني بو قدر گؤسترمه يه شرق کولتورو ايذن وئرير. مينياتورين ده جاذيبه سي و سئويمليليگي بوردان قايناقلانير. يني کوچه لرده کي متلک رسسامليقدا صنعت ديلينه يانسييير. آنجاق قرب بو سينيرلاري آشدي. ايشته رومانلاردا ائروتيزمين سؤزلرله تصويري، ائروتيک فضا ياراتماق چوخ اؤنم داشيدي. رومان اوخوجولارينا دا بو، اؤزلليکله گنج نسل آراسيندا تکان وئردي.
«دانس» آرالي ايليشکي، بير تورلو «بير» اولماق اوچون هسرتلي حرکتدير. دانسدا ايکي آدام «بير» اولا بيلمير، آنجاق بور بيرليک اؤزله نير. آنجاق «ديسدانس» ايکي آدامين ايچ-ايچه و آراليقسيز دانسيدير. «بير» اولما موتلولوغودور. بورادا سينيرسيز ائروتيزم دويقولاري اؤنه چيخارار. و مودئرن شعر و يا شعرسل بير تئکستده سؤزجوکلر بو ميسسيياني يئرينه يئتيره بيلرميش. بو اوزدن ده هر شعرسل بير متنده اوخوجودا وارليقلا ائروتيک تماس ساغلاياجاق قارماشيق سيرليليک اولماليدير. شرق عيرفانيندا بونا «وحدتي-ووجود» دئييلير. يعني سئوديگينله ايچ-ايچه گيرمه. مسافه نين اورتادان قالديريلماسي. بو اوزدن ده شرق عيرفان شعرينده آچيقجا ائروتيزم وار. مؤولانادا، هافيزده، فوضوليده، اتتاردا. تانرييا يؤنه ليکسه، بو ائروتيک دويقو، او زامان تانري ايله سينيرسيز سئويشمه دويقولاري سؤزجوکلره يانسييير. حتّی مؤولانا ايله شمسين سئکسوال ايليشکيلري نين اولدوقلاريني دا سؤيله ينلر بو آچيدان ياناشاراق بير ايديادا بولونموشلار. ياني اونلار بئله دوشونورلر کي، اگر بونلارين ياپيسيندا، ووجودوندا و روحوندا کيميوي عئينيليک وارميشسا، ندن بو قدر ياخين ايليشکييه ده گيرمه سينلر؟ چونکو مؤولانانين شعرينده شمس مؤولاناني روحن دويوران، اوندا روحي اورقاسم اولوشدوران بير اوبراز کيمي تقديم ائديلير. گؤر هاردان باشلاييب هارا گلديم. سانيرام بو قونودا بو قدر يئتر. بلکه سنين اوچون ماراقلي بيلگيلر اولار بونلار. اصلینده بونلاري يازماق ايستميرديم. آنجاق هر اولايين آرخاسيندا بير دويقوسال درينليک وار، اينسانئ روحونون ايستکلري وار. سنين سورولاري نين آرخاسينداکي او دويقوسال درينليگي آنلاتماق ايسته ديم.
Hiç yorum yok:
Yorum Gönder